• ×

07:21 مساءً , الأربعاء 8 ربيع الأول 1438 / 7 ديسمبر 2016

الإيجارات !

زيادة حجم الخط مسح إنقاص حجم الخط
يا جماعة صدقوني ما عمري فكرت أكون منصب أو ماسول

بس وش اللي يجيب بعض الأحلام ما أدري

الحاصل الأسبوع الماضي استلمت الراتب وقمت أوزعه

طبعاً لا تفرحون مو بشرهات لا أحد يجيني

كالعادة سددت البقاله والسواق اللي يودي العوال للمدرسة

والبنشري قايد ومغسلة الملابس ومحل الخضار

وعلى طريقي يا جماعة الربع

رحت مكتب العقار قلت أبسدد الإيجار أنا وخشتي

إلا ويعكر مزاجي هالخبر " الايجار طمر طمرة قشرة وصل 25 "

إلا مو عكر مزاجي وبس

إلا خرب ميزانية العمر كنت ادفع 13 وطمربنا 18

وهلحين 25 سألت فلاح راعي المكتب وش اللي صار

وش اللي حصل وش اللي رفع الإيجار

توقعت يقول عشان كاس العالم بالرغم

إن ما في علاقة بين الموضوعين بس متعودين كلما ارتفع

سعر شيء تكون الأعذار جاهزة وإحنا لازم نصدق

المهم

قال صدقني إن هذا عشانك معرفة ...

قلت امحق معرفة !!!

المهم أرجع البيت أحسبها وأقلبها في راسي

وأتذكر المثل " إذا كبرت همومك كبر المخدة ونام "

وآتقلب وآتقلب وآتقللللللللب أبغى النوم يسرقني

ولازلت ذلك العصامي الذي يكره السرقة ....

بس شسوي بعض الأحلام ترفع فيك وتخليك

ويييييييييييين !!!

تجيكم السالفة

رأيت فيما يراه الصاحي إني رازن بهالبشت

أنا ما ودي أكذب ما أدري هو بشت وإلا فروه

بس الله العالم إنه بشت

ومتعين ماسول في الغرفة التجارية ومش حيا الله ماسول

والله يكفينا وياكم شر الغرف ..

على طول قلت خلني آخذ فرصتي ......

آمر وأنهي " ثقافة مجتمع "

وأول ما سويت حطيت هاااك النظام السالفة

إيجار البيوت ناويهم ناويهم الله لا يعوق بشر

ناوي أحط لهذي المهزلة حد ... وأول شي

لازم نفرق بين التجاري والسكني

يعني إذا كان بيأجر فهو تجاري ما يبي لها مفتي

واللي يبا يبني بيت ما تكفيه الرخصة حق

البلدية ... لازم يمر الغرفة التجارية وأنا أسنعه

إذا إنه بيسكن جعله على القوة أبد يا خذ

له تصريح سكني وفوقها حبة خشم ...

وإذا كان بيأجر فيها كلام ثاني هذا نعطيه

تصريح تجاري وحسب المواصفات اللي

بيحطها راعي العمارة تصنف حسب مواصفات

ومقاييس وبصنف البيوت إلى 5 فئات

فئة " أ " أفخم شي مثل تكييف مركزي

وأثاث زين مو بحيا الله أثاث والمطبخ مجهز مو على البلاط

والحمام من زينه يجيب النوم مو تقول زنزانة " عوذة "

يعني فايف ستار لازم أقولها بالعنقليزي

لأني ماسؤوول كبير ...

هذي الفئة لها إيجار محدد من عندي من الغرفة

إي وما بخليه يلعب علي راح أخليه يراجع

عندي على مراحل لين يخلص البيت وكل

فئة حسب مواصفاتها بيكون ايجارهااااا

إذا انتهى من البناء ياخذ رخصة تأجير

مبين فيها السعر والفئة وكل شيء موضح

لا يقدر يزود ولا ينقص وممنوع أي مكتب

يستقبل أي عماره أو بيت من دون رخصة تأجير

واوذول أصحاب العماير القديمة اللي من عهد الفراعنة

ومليانه من هالصراصير وهالفيران

يااااااااااو تصدقون اني اخاف من الفار عندي

اشوف لي داب ولا فار ..

المهم ... والله يا بعض الشطحات مالها سنع ماهي

بزينة بس عاد تحملوا مستر ساخر...

ها ويقومون يأجرونها حالها حال الجديدة

معهم مهلة سنة يراجعوني في الغرفة وأرسل

معهم لجنة يشوفون كم يسوى حسب

معايير ومقاييس ساخر على وزن ساهر وتصدر له رخصة ايجار

مو يرش العمارة بسطل بوية وقال جديدة

ذا حلمنا .. العربي .. أقصد حلمنا .. والسلام .

لحظة وين رايحين وراكم مستعجلين

نسيت أقول لكم بعد سنة وما طلع رخصة

لا يطالب بالإيجار ويقول والله جرد فيني والله

ما أعطاني إن شاء الله ما يعطيه ولا ريال

وإذا ما في رخصة تأجير تعتبر مخالف

وأصكك بهاك الغرامة !

يا زينها زيناااااه لا وأدبل الغرامة بعد شهر إذا ما سدد !!



وسلامتكم

بواسطة : ساخر الفيفي
 12  0  1537
جميع الأوقات بتوقيت جرينتش +3 ساعات. الوقت الآن هو 07:21 مساءً الأربعاء 8 ربيع الأول 1438 / 7 ديسمبر 2016.