• ×

05:59 صباحًا , السبت 11 ربيع الأول 1438 / 10 ديسمبر 2016

التونة و ما تسوي ! 

زيادة حجم الخط مسح إنقاص حجم الخط
يقول الشاعر:

وما أكثر الأحلام حين نعدها ... والباقي ما تغير

تذكرون الحلم اللي سولفت لكم عنه الأسبوع

اللي راح لما قلت لكم حلمت وأنا ماسول في الغرفة

هااااا من ذيك الساعة والبشت ما حول من كتوفي

تقول " عمي الشيخ "

تخبرون الماسولية صعبة وتبون الصراحة

والله إني صرت أخاف من هالبشت يجيب فيني العيد

لأني صحيت وأنا محتر وهذي مواري مهي بزينة

لكن بنقول لكم بها لحلم .

ذيك الليلة تعشيت تونة !!!

ويقولون إن به واحدن في جده يقول

لا تاكل التونة وتنام

ما ادري هو عشان القطاوة لا تسري عليك

أو إن لها دخل بالأحلام ...؟

ويا كثر يقولون عندنا

المهم ... هذا مو موضوعنا

بس يقولون الحديث ذو سجون

موضوعنا سلمكم الله بعد ما كليت التونة

حطيت راسي . وياليل منت بليل

سرى فيني هاك الحلم .

حلمت إني ماسول . لا قلت ماسول ماسول

بس مو في الغرفة لأني ما احب الغرفة

الحاصل ركبت هالموتر وقلت خلني أتمشى

ومنها استكشف " اللي يسمعني يقول كولمبس "

ولا بقيت ديره الله الله ...

وأشوف في الحلم هالمدن وبين كل مدينه ومدينه

أكثر من 100 كيلو ارض فاضية

تقول بطن ايدك " حلوة بطن "

وآتذكر يقولون وأنا ذمتي تبرا أنا ما شفت شي

يقولون " في إحصائية تقول إن ثلاث أرباع

السعوديين لا يملكون مسكن

ها والله ارجع الرياض وازهم الربع واقول لهم

على الماضوع . قلت هلحين تشوفون لي عن طريق

البلدية أو الجهة الماسوله اللي ما يملك أرض

وتسجلون لي أسمايهم في ورقة .

وينقز طحيمر يقول الله يهداك أي ورقة

على كذا يبا لك مصنع ورق كامل قلت المهم

حاجتنا نعرف اوذول اللي ما يملك الواحد

حفنة تراب . واصلاً مافي أمل ما دام أسعارها

من 200 ل 300 الف خل عاد يبني ويسكن

وإذا جمع قيمتها متى يجمع حق البناء إذا

قيمة الارض وتكلفت البناء توصل 1000000

إذا كان راتبه من الخمسة وفيها هذي ما تسد

احتياجاته خل يوفر منه مليون

وأكيد إن في واحدن الله معطيه من خيره

ولا درى عن ها الضعوف بينقز يقول

إن في أراضي منح وفي قروض

لكن ابنشدكم تدرون وين هالمنح

هذي في خبوت تقوم ناقة صالح

وباقي ما جاها العمران يبغالك طايره

عمودية عشان تشوفها .

لا وإلا هالقروض في ناس مقدمين من

عام 1400 ويرددون يا ليل مطولك

المهم جيبولي اسمايهم

ولا تجيبون لي اللي معه في كل مدينه

منحه منحتين ما ينزل مخطط إلا وتلقاه

يطامر مع الشريطيه لا اشوفه يوطوط عندي

فأحش رجوله حش .

وهالاراضي الفاضيه تسوى مخططات متكاملة

من شوارع لصرف صحي لإنارة ورصف وجميع الخدمات

تكون قبل كل شي مو يبدأ الحي يقوم

ويجونك أهل المشاريع !!؟ يشقون في هالشوارع

وحفريات لا والمشكلة بعد ذا كله تغرق

البلد في سطل مويه . هاااااا إنت شفت بعد ما تقوم

ها لمخططات بالكامل توزع على ها لضعوف

وكل شخص ما يملك أرض يحصل على أر ض

وتكون مقابل مبالغ رمزية من 5000 ل 10000 الالاف

وابغاها في وقت قياسي 5 سنوات اكثر شي

ومهي خسارة في ابن البلد .

وممكن يطلع احد يقول وش اسوي

بها لبرحة ؟ أتمرغ فيها !

حنا نبي نسكن وحنا وحنا

اقول له لا تستعجل المطامر مهو بزين

اركد الحل عندي

بس عندي ماضوع بسيط

مع طحيمر أبي أخلصه والخميس الجاي قريب

وإذا ما شفتوني اعرفوا إن البشت جاب الغايبه

----------------------------------------------------------
ملاحظة : الأخطاء الأملائية واللهجة متعمدة من الكاتب

بواسطة : ساخر الفيفي
 22  0  2195
جميع الأوقات بتوقيت جرينتش +3 ساعات. الوقت الآن هو 05:59 صباحًا السبت 11 ربيع الأول 1438 / 10 ديسمبر 2016.