• ×

01:23 صباحًا , الإثنين 6 ربيع الأول 1438 / 5 ديسمبر 2016

طحيمر وعودته الميمونة

زيادة حجم الخط مسح إنقاص حجم الخط
وش حالكم ؟

ماعليش أبطينا عليكم وادري إنكم مشتاقين !!

بس طحيمر توه وصل على رحلة الساعة عشر طعش

كان في جولة !

لا تحسبوها جولة مصارعة

هذي جولة في أوروبا وما أدراكم ما أوروبا

أنا في الحقيقة ابتعثته لأني أعتمد عليه بالحيل

وأزين شي فيه لا هو بسروق ولا كذوب

المهم دزيته لأوروبا والدول المتقدمة

يشوف لنا حضاراتهم ويشوف لنا ثقافاتهم

إن لقينا عندهم شي " منتاز " خذيناه

وأكيد سمعتم بتبادل الثقافات

إي .... عاد الثقافات الزينة لا تحسبون ساخر انحل

وفكونا من التشدد اللي على غير سنع

ترون مو بعيب ولا حرام إن شفنا عندهم

بعض الأمور الزينة وخذيناها منهم

وهذا هو هدف طحمير في رحلته

وأول ما قلت له وشرحت القضية تزهل بالماضوع

بس قال عنده شرط اللي هو البشت

يبيني أعطيه يكشخ به في أوروبا

قلت أنت صاج يا طحيمر بشت في أوروبا

تراهم بيشوفونك ببشت بيعرفون أنك سعودي

وبيتوقعون إن عندك بير نفط ويمكن يغتالوك

وبعدين كيف بعيش من غير طحمير

أقول قم يا طحيمر تحقط بهلجنز وتلها يا سنايدي

واحدد له الدول اللي يزورها

منها بلجيكا والسويد وهولندا ومجموعة دول

تحصلونها في ورقة في جيب بنطلونه

وفي المطار وأنا أودعه استثنيت السويد عشان ويلهامسون

أهيب عليك يا ولي خربت علاقتي مع السويد

دايم يسحب في لاعبي العالمي أأأأخ لو يجيبه كحيلان

لو خلاه احتياط بس يا خوك يفكنا من شره

الحاصل إن طحيمر جاب العلم الغانم

تذكرون الأراضي اللي نحلم !!! إنها تتوزع علينا

ها رحت البلدية أتشوف وأنشد عن شروطهم

في التعمير لقيتها شروط تقص الظهر

ياااااااو وهاللي يسمونها الميده ... لحظة

مهو الميد لا تلخبطون الميد سمك يا زينه زيناه مشوي

صدقوني إنك ما تشبع فيه بس تشوطه على هالجمر

المهم هالميده والأساسات يبا لها ميزانيه بلحالها

تخليك على الحديدة وعلى بال ما تقوم

العمارة عظم تجيك الشغلات الثانية و يا ليل مطولك

اللي يشوفهم يقول أنك بتطلع ناطحة سحاب

طبعاً إن كنت من هل "الدخل المهدود "

على ما قال الباكستاني انسى إنك تبني

هاااه والله يا علومن جابها طحيمر يقول شاف

في الدول الأوروبية شي ما عمره شافه !

يا بيوتن عندهم تاخذ العقل

يحلف إن ما عندهم هالسوالف والشروط التعجيزيه

أحياء راقية ومرتبة ومنظمة وهاك التشجير

و الإنارة والشوارع الزينة وإن قلت نظافة ما مثلها

والمستاصف عندك والأسواق حواليك وكلها

من هالبيوت الجاهزة يسمونها بيوت أمريكية عندنا

بس تبيي تتصور بجنب البيت من حلاته

ولكل بيت موقف خاص براعي البيت

مو مثل عندنا 30 شقة و7 مواقف !

وتلقى الأحياء عندهم تنظيم واحد

بيوت متشابهة يسمعون بالعشوائية

مدن كاملة هلون وتلقى يسكنها التختور والمدرس

والقاضي والتاجر والفقير

قلت له أي ... بس مشكلة ... الحرايق

قال ضحكتني اوذووووول يا ساخر

ناس أهم شي عندهم السفتي

قلت سبحان الله أبد نفس عندنا في السعودية

السفتي حطوه حتى على سيارة معقب البلدية

إلا وشوي طحيمر يضحك قال الله يهداك يا ساخر

أي بلدية واي سفاتي

اقصد السلامة يسمونها سفتي بالعنقليزي

وهم حريصين أكثر منا على أي شي فيه خطر

حتى لو كان على قطوه

والي يسمعك يقول بيوتنا ما تنحرق كل شوي !

قلت دام السالفة كذا " خلووووها "

نبا نشوف لنا شركة عالمية تقوم

بتصميم هالاحياء وصناعة البيوت

وابد خلو العالم تسكن . عز الله على كذا

إنها زينة ولا هي مكلفة

إن طارت وطارت 100,000 وأنت ساكن

وتكون على ما قال طحيمر نفس الترتيب

ونفس التصميم والحركات بركات

وإذا احتاج الواحد قرض يكون بقسط شهري

من راتبه والبنوك على الذمة عز الله إن تطلع

عندنا أحياء سكنية من أرقى دول العالم

وعلى ما قال الباكستاني " تكون لذوي الدخل المهدود "

ويكون لكل حي إدارة مستقلة

وأسواق ومحلات تجارية تؤجر من قبل

الدولة ويكون مردودها يصرف على الحي من صيانة

وتشجير ونظافة ومرافق

وأي أمور تفيد الحي وهالا رض ممنوع ببيعها

وش قلتم يا رجال ؟!

نتوكل على الله

ذا حلمنا والسلام هاااا اركدوا ما جبنا طاري النوم



وموعدنا الخميس القادم إن الله أحيانا

بواسطة : ساخر الفيفي
 12  0  1539
جميع الأوقات بتوقيت جرينتش +3 ساعات. الوقت الآن هو 01:23 صباحًا الإثنين 6 ربيع الأول 1438 / 5 ديسمبر 2016.