• ×

12:52 صباحًا , الأحد 5 ربيع الأول 1438 / 4 ديسمبر 2016

الملحوس سعيدان

زيادة حجم الخط مسح إنقاص حجم الخط
ياااااااااااااو

يا أنا قمت من النوم مفجوع

ما غير أتفل شمال ويمين وأتعوذ وأبسمل

معرق وحالتي حالة وأم العوال تقوم تنطل

علي كراتين الفاين ..

وترش علي من هالماء

بسم الله عليك عوذه يا ساخر وش فيك

وقلبي ما غير يرتجف يدبك تقول

دبيك الخيل وأنقز آخذ بطاقة الأحوال

وأحسب كم عمري .

وأم العوال مسكينة ما غير وش وفيك .. وش فيك

وش حلمت ؟ أنت حلمت فلاح !

وإلا حلمت فار وإلا وش حلمت من مصيبة

قلت ولا شي .. ولا شي أعوذ بالله من المجاااااااااان

السالفة يا جماعة إني بعد ما تخرجت من الثانوية

بشهادتي المرموقة قلت ما لها إلا رجالها

آخذ شهادتي وعلى الحلاق " صفر " واكتب هاك المعروض

تقول صك وأشتري ملف .

وبالمناسبة عندي اعتراض على مسمى ملف

" نقول تلفلف شمال ويمين " والملف يعني

منحنى خطر يعني زاوية منبعجة " طيب يا النحوي "

وش رايكم نسميه طوالي بدل ملف لأني

أتشاءم من الملفات !

نرجع لماضوعنا المهم القط الشهادة ومعروضي وأحطهم في طوالي

وأدزها على التسجيل " أهم شي أخدم وطني مبسوووووط "

وأول ما قبلوني أعطوني هالبدلة .

وآخذها ووينك يا محي الدين كوتي أتصور هاك الصورة

تقول عمود في خيمة طحيمر واقوم وأعلقها في المجلس

اشوف نفسي تقول وزير والطموح وييييييييييييين !!

وهاك النهار أسولف مع شايب يقال له سعيدان

عليه هاك الرتبة الزغيرونه

وانشده متى بصير زيك قال قصدك تصير شايب زيي !!

قلت اهيب يا سعيداااان فال الله ولا فالك !

عوذه أنا أنشدك على هالرتبة متى يحصل لي الشرف

والبس مثلها وأحس إني ماسول مثلك

قال اريحك يا ساخر الثنتين كلها بعد 20 سنة

شايب ورتبة ولا بعد ازيدك من الشعر بيت

تاخذ الثنتين وتحصل على تقاعد مجاناً

قلت والله المنسم يا سعيدان الظاهر إن سعيدان خرف

وتروح الأيام وأنا أقول في نفسي هالملحوس سعيدان

وش يقصد في كلامه ؟

وفعلاً فحطت10 سنوات وأنا في رتبتي اللي سجلت بها

وتجيني ترقية و10 سنوات ثانية لين صرت مثل سعيدان

قلت لا والله أنا المنسم مو سعيدان يهبا من الفراسة

ها و الله ذاك النهار رجعت البيت قلت خلني اريح شوي

وأنسى التفكير ويا ليتني ما رحت !

يجيني هاك الكابوس الظاهر إنه جاثوم

تلبسني هالجاثوم وأنا منسدح على فراشي

أطالع وأفكر وأقول في نفسي

لا والله إلا صرت يا ساخر شايب مثل سعيدان

وفي كل شي حتى السبيكه وأقوم أحسب

تقول مدرس رياضيات أول ابتدائي

و أقول هذي عشرين سنة وأنا ما وصلت ربع

الطموح اللي اطمح له وين طموحي وين هاك الأحلام

ويا خوفي من المجان واقعد أتعوذ من المجان

وأقول في نفسي النظام واضح وصريح

كل رتبة لها وقت مستطيل قصدي معين

بس إينه فين اللي همش هالنظام

وعذرهم اللي غصب تقتنع فيه ولو مو مقنع

أرقام وظيفية ما في !

طيب يا جماعة إذا المشكلة مشكلة أرقام

تستحدث أرقام !

بتقولون يبا لها مزايا مالية

أقول دولتنا ما قصرت ولا بتقصر وقادرة على هالمزايا

يا جماعة وربي ما ني ندمان على يوم خدمت فيه وطني

وخدمتي لوطني مهيب خسارة ولا فيها منا

ما سقنا أنفسنا في خدمة الوطن وعندنا أرواح بديلة

والوطن مو خسارة فيه لو سقيته دمي

من غير رتبة ولا راتب

لكن هذا حق أعطيت إياه من دون طلب مني

دخلت الخدمة بموجب نظام يحفظ لي حقي

والدولة يا جماعة الله يحفظها فرضت لي هذا الحق

ودائماً تحث وتأمر بإعطاء الحقوق لأصحابها

دولتنا ما صادرت حق أحد ولا أمرت بمصادرة حق أحد

ولا يلحقنا شك في ولاة الأمر

هاااااااااا هلحين من ألي تجرأ على حق هالموظف المسكين

وصادره حقه ووقف حجر عثرة في طريقه

يا جماعة صدقوني إن أي واحد مثلي

وامثال هالوجيه السفرة

حلمه وطموحه إن أي شي عطته إياه الدولة

ما أحد يحرمه منه !!

طبعاً تزاحمت الأفكار في راسي لين قلت إنه

ضرب عندي فيوز مثل سعيدان

وكل شي قاله سعيدان وصل

ويا خوفي من المجان

ولو تشوفون سعيدان بعد المجان ؟؟؟

ما تصدقون !

لا أحد يشمت لأن هذا مصرينا كلنا


وسلامتكم

بواسطة : ساخر الفيفي
 14  0  1435
جميع الأوقات بتوقيت جرينتش +3 ساعات. الوقت الآن هو 12:52 صباحًا الأحد 5 ربيع الأول 1438 / 4 ديسمبر 2016.