• ×

03:30 مساءً , الأربعاء 8 ربيع الأول 1438 / 7 ديسمبر 2016

(البطاله والتناحه تنهك الشعب السعودي!)

زيادة حجم الخط مسح إنقاص حجم الخط


هلحين ياشباب في اشياء لازم نتخلص منها
يعني تطشونها
قدام تمسكون معي خط
مثل مافي امل , هذي ننساها
مثل انت صاحي ,كمان ننساها
مثل ياعمي انت من جدك
مثل لاحجة البقر على قرونها
مثل انقزها,, اي هين ماعليه
اشياء نبتعد عنها من اجل سلامة الرحله
لازم يكون في تفاءل
الى متى وحنا شعب مستنزف
الى متى وحنا شعب نختار الطريق الصعب
ونترك السهل لغيرنا
يا أخي انت ماخلقك الله عشان الوضيفه وهالملف العلاقي
يا أخي شيل من مخك شي اسمه وظيفه
وانا هلحين ماراح اقول الدوله ماسوله عن البطاله!
واجلس احط يدي على خدي
واحتري الوظيفه
يعني مختصراً اقول الوضيفه مهي حل للبطاله
الوظيفه السبب في البطاله
الحل للبطاله بيدي وبيد الدوله
وانا قلت لكم اني ابي من الدوله شي واحد
والباقي علي انا ياسيادة المواطن
ادري بتقولون ماجبت جديد
لكن الرسول صلى الله عليه وسلم وش يقول
يقول "انما بعثت لاتمم مكارم الاخلاق"
ابي من الدوله تساعدني وتاخذ بيدي لأقف
في زحمة السوق على رجولي وذلك في عدة خطوات
لأن"الاعمال الحرة والمهن والتجارةوجانب الخدمات مسيطرين
عليه الاجانب وهذا يمثل أكثر من 75%
من مصدر الرزق في البلد ومو انا اللي قال
هنا الإحصائيات تتكلم"
الخطوة الاولى :الحين المواطن يبي له جرعه منشطه
انتبهو مو قصدي منشطات لا أحد يفهم بالشقلوب
ويقول ساخر يقول اللي يبي وظيفه
يسف له من هالبلاوي
لا انا اقصدجرعه تعريفيه باهمية الاتجاه الى الاعمال الحره
واهمية المهن ودخلها والتعريف بالاعمال السايبه!
يعني لازم المواطن يصحصح
وين المشكله لو قامت الجهات التعليميه
بعمل نشرات توعويه للمراحل الثانويه
وترتيب زيارات للمدارس يتم من خلالها زرع حب المهن
والاعمال والاعتماد على مصادر الرزق من خيرات البلد
وكذلك مهرجانات من قبل الدولة في الاماكن العامه
يتم من خلالها طرح المشاريع الاستثماريه الصغيره
في حجمها الكبيرة في مردودها
يعني تشوف الاجنبي يصك في الشهر من 10000 و20000
وتوصل الثلاثين وانت تدور وظيفه ابو4000
والبنقالي اللي تنزل من سيارتك وتقول له صديق
سوي غسيل كلين ميه ميه
اقسم بالله انه يصفي شهرياً اطلق من راتبك
وراح انا اثبت لك بس صبرك معي شوي
(ماعليش راح اشرح ضمن الردود بعض الامور عشان لانطول وتملون)
الخطوة الثانيه:فتح المعاهد
لحضه لايجيني واحد ماشي 2000 ويقول في معاهد
اقول لك نعم بس ماتلاحضون ان المعهد يعطي دوره 6شهور
والمتخرج اخذ الشهاده وفي الملف الاخضر !
ورررررررررر ووينك يالوظيفه!!
يعني معذور راضع الوظيفه بالرضاعه
ابوه موظف وعمانه وخواله وجيرانه
لا هالدوره اللي اتكلم عنها دوره تأهيل لسوق العمل
وتكون دوره يتقن من خلالها العمل ويستطيع الانتاج بكفاءه
لاتقولون مافي امل
ترون مخ البنقالي مو ازين من مخ ابن البلد
وهالمعاهد تكون مثل جمعيه حكوميه تقوم بتدريب السعوديين
واحلالهم محل الاجانب وفق برنامج معين
والوفت محدود في كم سنه وخلاص السوق سعودي
ويتم دعمهم مادياً وتوفير الحمايه لهم من المستثمرين
وخاصة اهل العقار مايقص ظهر هالمسيكين بالاجار
ومن اول على البنقالي 5000 وأذا جا السعودي 30000
وعلى فكره نسيت اقول لكم لا تحسبون ان
اصحاب المحلات اوذول سعوديين
والله ان مافي الا الاسم فقط والسعودي ياخذ 2000 ريال
والباقي برا على برا
متى تروح صناعية السيارات تلقى سعوديييييييييييين بس
متى تروح المطاعم تلقى ابن البلد
متى تروح البوفيه تلقى ابن البلد
متى تروح سوق الاجهزه الالكترونيه تلقى ابن البلد
متى تحصل ابن البلد نزل الشارع يدافع عن مصدر رزقه
يطرد الاجنبي ويحل مكانه
وزبدة الحكي "اللي ابيه من الدوله "
تساعد ابن البلد يحل محل الاجنبي
وتدعمه مادياً وتعليمياً في السوق
(وما راح اقول حلقه ثالثه عشان ما نطول )
لكن راح نتداخل ببعض الافكار اللي راح تعجبكم بالردود

ونلتقي في الردود على خير

بواسطة : ساخر الفيفي
 10  0  1623
جميع الأوقات بتوقيت جرينتش +3 ساعات. الوقت الآن هو 03:30 مساءً الأربعاء 8 ربيع الأول 1438 / 7 ديسمبر 2016.