• ×

11:14 صباحًا , الأحد 5 ربيع الأول 1438 / 4 ديسمبر 2016

الظاهر أن الفتيحية مطنوخه!!

زيادة حجم الخط مسح إنقاص حجم الخط
الظاهر أن الفتيحية مطنوخه!!
=================================


انتم هالحين تدللوا تبون كاشير والا كاشيره!!
تذكرت سالفة الببسي والسفن
وهذي سالفتها في سنتن من السنين
عزم شعبنا المجاهد ان يقصف اقتصاد امريكا
بقاصمة الظهر\"الببسي\"
ابد من يوم تسفط عند البقاله تنشد خويك
وش تشرب اجيب لك ببسي
قال لا عوذهـ وشلون اشتري ببسي؟
انا مقاطع بس جيب لي معك سفن !!
وعلى ماقالوا منها حج وبيع مساويك
من جهه مقاطعه ومن جهه الببسي ضار بالصحه
واللي طرا هالسالفه ياجماعه مشكله
اذا الوزاره تنطبخ فالبيت وبتعاون عائلي
وتنفذ بحذافيرها على الشعب
قدام كم شهر قامت الوزيره !حرم سعادة الوزير
طبعا هذي نسبه لبعض الدول المره تتسمى بمنصب زوجها
المهم صرحت حرم الوزير فقيه ماغيره وزير العمل
تقول اهم شي حق المره مايضيع فالطوشه
هه منا والا منا
وحسب منطق لسانها تقول ان في كلام بينها
وبينه بالبيت عاد وش هو الله اعلم
هااااااااااااا ماجلسنا الا كم يوم
وقامت احد الشركات التموينيه (بندهـ)
بفتح مجال الوظائف للنسوان (كاشيره)
والله اللي وراهم ظهر ياااااااااااااو!
المهم ارعد شعبنا وزمجر
واعلنوا المقاطعه لتلك الشركه اللي هي خويتنا بندهـ
طبعا خويكم ساخر من ضمن المقاطعين
لأنني والحمد لله عصامي
حتى البنقاله المتخلفين اللي مستثمرين مواقف بنده
للغسيل كمان قاطعناهم
في حال وجود كاشيره واحده في احدا نقاط البيع
لكن اللي افكر فيه وش معنى الكاشيره بس
وش معنى بعض المحلات التجاريه
ابد فاتحه المجال للتوظيف ونسونة مايجب مرجلته
ورغم اننا ارعدنا وزمجرنا من فتح محلات نسائيه
لاكن للأسف لم تأتي زمجرتنا نتاجها
تحصل المره موظفه داخل المجمع واخص محلات الملبوسات
لا وبعد خليطي موظفين وموظفات
ابد النسوان يستفسرون من الموظف
والشباب والشيبان يستفسرون من الموظفات
تلقاها داخل المحل مرشده
لا وبعد تلقاها حارسة امن
والحراسه الامنيه هنا تعطيها خبره مستقبلآ
في الامن واحتمالآ تلقاها بعد كم سنه على الدوريه
اذا تم نسونة الانظمه الامنيه في البلد
وعندك على سبيل المثال
محلات ستي ماكس وسنتر بوينت
مدري هي مثل سالفة السفن والببسي
رفضنا الببسي ورضينا بالسفن والشاني
رضينا بالوظيفه داخل المحل ورفضنا الكاشيره
والا انهم خذوها في صمت ماهايطوا مثل بندهـ
وطبقو استعينوا على قضاء فسادهم بالكتمان
والظاهر ان الفتيحيه مطنوخه

بواسطة : ساخر الفيفي
 3  0  1161
جميع الأوقات بتوقيت جرينتش +3 ساعات. الوقت الآن هو 11:14 صباحًا الأحد 5 ربيع الأول 1438 / 4 ديسمبر 2016.