• ×

07:15 مساءً , الأحد 5 ربيع الأول 1438 / 4 ديسمبر 2016

مِترو الخبوت!!

زيادة حجم الخط مسح إنقاص حجم الخط
مِترو الخبوت!!
===================

كل واحد يفكر بهدية يقدمها لعواله مقابل نجاحهم
الي يقدم سيكل واللي يقدم علبة حلاوه ابوبقره!
لكن ساخر غير حب يقدم هدية متميزه عائليه
بما ان ام العوال تدرس تجويد قرآن ونجحت
والعوال يدرسون والحمد لله سنة دراسيه تكللت بالنجاح
قلت مالها إلا اقدم لهم مفاجأة النجاح
فوعدتهم برحله عبر مترو الخبوت(القطار)!
فمن اول ما فاجأتهم بالرحله الميومنه!!
جات الاسئله وشلون القطار وكيف مراتبه واسئله كثيره
ما ادري يمكن احساسهم يقول (توهيقه)
قلب المومن دليله!!
قالوا نبغى نشوف في الكمبيوتر أكيد انه موجود
ووالله البلشه أخاف يشوفونه ويقولون رح بلحالك
وقمت اسولف لهم عن مترو دبي الآلي
اللي لاسواق ولا شي تماتيكي ينطلق ويصل في توقيت معين
وافتح لهم على متروا انفاق لندن عشان يتحمسون
لان سمعت قطارنا تنقظ عسل!!
وكمان اوريهم قطار اليابان وعشان لا يقولون توكل على الله
قلت اليابان استنسخوا قطارهم من عندنا
زي استنساخ النعجه دولي
وفعلاً توجهنا بحفظ الله ورعايته الى محطة السكه
وكانت اول مفاجأة لهم لما ركبنا القطار جا نصيبنا كراسي بالشقلوب
ظهورنا جهة الطريق ووجيهنا على ورا
تذكرت جحا لما يركب حماره بالمقلوب!!
وابتداالمشوار وانطلقت الرحله
سألوني هلحين بنمشي ريوس والا اشلون؟
قلت بس نلقى محل نديور منه ونطلع سيده على طول
بس انتم استمتعوا بالرحله وشوفوا
مناظر الرمال قبل تغرب الشمس
شوي الا والقبطان يعلن (تعلن الخطوط الحديديه عن موعد اقلاع رحلتها)
وعلى الركاب ربط احزمة الامان والبقاء في مقاعدهم
قمت اتلفت ابي الحزام وادور وينه مالقيته
وانزل اطالع تحت الكرسي وآتلفت يمين يسار
قلت الله يستر ما يصكوني بقسيمه عدم ربط حزام
عرفت ان خدمة الحزام غير متاحه
وتذكرت السيارات اللي قبل موديل 85 ما يشملها النظام
وبما ان قطارنا من عهد الملك عبد العزيز طيب الله ثراه
من عام 1351 قلت أكيد ما يشمله النظام في الحزام
سألوني الربع وين الحزام اللي يقولونه
قلت هذا قطار من دون حزام عشان الركاب يعيشون الحريه
صحيح لو يحصل شي اول واحد بيحضر عند آخر واحد
بس من مبدأ الله يستر اتاحت موسسة السكة الحديديه
لكافة الركاب التنقل من مقعد لآخر وعشان البزارين
ينطنطون على روس الركاب وبكامل الحريه دون قيود
لا يغركم الحادثين اللي حصلت تصادم قطارين في شهر
هذي عين ما صلت على النبي
المراد نص ساعه وتوقف القطار
انبسطوا قالوا ما شالله يامسرع ما وصل
قلت في نفسي هين والله إن ترددون ياليل مطولك!!
شوي اعلن الكابتن مدري القبطان انه راح يتوقف قرابة من10 دقايق
الى نصف ساعة لمرور قطار آخر في الجهة المقابله
قلت ما دام وقف خلني اروح مطعم القطار
وادخل هاك العربه وعشان تعيشون معي الموقف
تصوروا بوفية بنقالي بجمالياتها ورائحتها الزكيه
لا والا عاد الحمام متر في متر لازم تدخل ريوس
ما يمديك تديور داخل الحمام هنا الكرسي وهنا المغسله
والنظافه ماراح اتحدث عنها حفاظاً على شعور الركاب
اقصد حفاظاً على مشاعر القراء لإن في امور ما تنقال
الحاصل 6ساعات طقيناها
وتمنيت ان الرحله اطول عشان العوال يستمتعون اكثر!!
وهذا نموذج للمواصلات عندنا
ابد انت مواطن ما عليك الا ان تختار وسيلة التطفيش في السفر!

بواسطة : ساخر الفيفي
 4  0  1088
جميع الأوقات بتوقيت جرينتش +3 ساعات. الوقت الآن هو 07:15 مساءً الأحد 5 ربيع الأول 1438 / 4 ديسمبر 2016.