• ×

03:16 مساءً , الأحد 5 ربيع الأول 1438 / 4 ديسمبر 2016

تناقضات 

زيادة حجم الخط مسح إنقاص حجم الخط


هنا نامت عيون الناس واتغلى علي النوم=وانا اللي من صبيحة أمس كنت مْواعد الأحلام
على وجهي من اعراض الأسى ما يشبه اليحموم=وفي صدري من الأزمات ما يكفي سنة قدّام
أمامي رزمتين اوراق مركومة طوال اليوم=وقدامي قَلَمْ متخوّف ارمي به بعد أيام
وانا فكري وفلسفتي تقول ان القلم مظلوم=وتنظر للورق من زاوية من يكره الظّلاّم
ملايين الورق تحفظ سنة واكثر ويمكن دوم=مع انه حبرها منهوب من ملكية الأقلام
مثل من يسرق العاجز وياكل لقمة المحروم=ويتصدر فلاش الشكر في تلميعة الإعلام
عجزت افهم تناقض مجتمعنا الدايخ المحموم=واحس ان الجنون اريح من الحيرة والاستسلام
وانا لا جيت بفهم وضع غيري وْرحت لا مفهوم=يزيد الوضع تعقيده وتزداد الجروح ايلام
يسير المجتمع ويبدّل المعلوم لا معلوم=ويبقى مْعادلة صعبة ولغز يحيّر الأفهام
فقير القوم يترجى بقايا حقه المهضوم=ولا تترك له اسنان الغنيّ الا ركام عْظام
نضخ اموالنا للي يشبّعنا تراب اللوم=ولا نستكثر انفاق الريال الا على الأيتام
مثقفنا يقول: العنصرية تفكك المنظوم=مع اني للأسف ما اطيق اهل جدة ولا الدمام
وعالمنا يقول: احذر ترى لحمي أنا مسموم=ولحم اللي يخالفني حلال لنصرة الإسلام
مطوعنا يحرّم وجه ابو نورة على الألبوم=ويعشق "فوق هام السحب" لو من حنجرة أحلام
وداشرنا يصلي الفرض والسنة بشهرالصوم=ولا حانت صلاة الفجر يوم العيد راح يْنام
نقول الحكم حكم الشرع ما تطغى عليه سْلوم=ولا جانا القوي كنّ السلوم اولى من الأحكام
نحبّ اللي بعيد اما القريب نعامله بالسوم=وفي الآخر تساوت عندنا الأهرام والأقزام
حرام اللي وصلنا له ويا عيباه عيب الشوم=ويا للعار عار الهام لا داست عليه اقدام
سكتنا عن بلاوينا وهذا الحال والمقسوم=ولكن لو نبي ننكر فهذي قمة الإجرام


 26  0  2778
جميع الأوقات بتوقيت جرينتش +3 ساعات. الوقت الآن هو 03:16 مساءً الأحد 5 ربيع الأول 1438 / 4 ديسمبر 2016.